Қазақстанда 2026 жылдың 1 шілдесінен бастап ипотекалық тұрғын үй қарыздары бойынша ең жоғары сыйақы мөлшерлемесі 25%-дан 20%-ға дейін төмендетіледі, ,-деп хабарлайды «Dalamedia» ақпараттық порталы.

Бұл шешімді Қаржы нарығын реттеу және дамыту агенттігі мен Ұлттық банк қабылдап отыр. Негізгі мақсат – халықтың несие жүктемесін азайтып, баспана алуды қолжетімді ету.

Жаңа тәртіпке сәйкес, 16 мамырдан бастап банк несиелері мен микрокредиттердің шекті мөлшерлемелеріне қатысты бірқатар өзгеріс күшіне енеді.

Мамыр айының ортасынан бастап кепілсіз банк несиелері мен микрокредиттердің жылдық тиімді сыйақы мөлшерлемесі 46%-дан аспауы тиіс. Ал кепілмен берілетін қарыздар үшін бұл көрсеткіш 35% болып бекітілді.

Сондай-ақ халық арасында «жалақыға дейінгі қарыз» ретінде белгілі қысқа мерзімді микрокредиттерге де шектеу енгізілді. Сомасы 45 айлық есептік көрсеткішке дейінгі, яғни 194 625 теңгеден аспайтын мұндай қарыздардың күндік пайызы 0,3%-дан, ал жылдық мөлшерлемесі 179%-дан жоғары болмауы қажет.

Жаңа талапқа сай, несие шартындағы пайыздық мөлшерлемеге барлық комиссия мен қосымша төлемдер де енгізіледі. Бұл қарыз алушының нақты шығынын ашық көрсетіп, қаржы нарығындағы айқындықты күшейтпек.

Айта кетейік, бұған дейін ипотека мөлшерлемесін 20%-ға дейін төмендету бастамасы бірнеше рет кейінге шегерілген еді. Алғашында банктер дайын емес екенін айтса, кейін базалық мөлшерлеменің жоғары болуы себеп болған. Себебі базалық мөлшерлеме 16,5%-дан 18%-ға көтерілгеннен кейін кейбір екінші деңгейлі банктер ипотекалық несие беруді уақытша тоқтатқан.