Атырау облысында экологиялық талаптарды бұзғаны үшін «Теңізшевройл» компаниясына 53,7 миллион теңге көлемінде айыппұл салынды, -деп хабарлайды «Dalamedia» ақпараттық порталы.

Бұл туралы облыстық экология департаменті мәлімдеді. Ведомство мамандары тексеру барысында кәсіпорынның қоршаған ортаға бөлінетін ластаушы заттар көлемі рұқсат етілген межеден асып кеткенін анықтаған.

Осыған байланысты компанияға қатысты әкімшілік іс қозғалып, материалдар Жылыой аудандық сотына жолданған. Соттың 20 сәуірдегі қаулысына сәйкес, «Теңізшевройл» ЖШС кінәлі деп танылып, 53,7 миллион теңге көлемінде айыппұл төлеуге міндеттелді.

Айта кетейік, бұған дейін де компания экологиялық талаптарды бұзғаны үшін жауапкершілікке тартылған. 2025 жылдың шілде айында зиянды заттарды ауаға шығарғаны үшін 639,6 миллион теңге айыппұл төлеген болатын.

Қазіргі таңда «Теңізшевройл» жобасындағы үлестер бірнеше ірі компания арасында бөлінген. Оның 50 пайызы Chevron-ға тиесілі болса, 20 пайызы «ҚазМұнайГазға», 25 пайызы «ЭксонМобил Казахстан Венчурс Инк.» компаниясына және 5 пайызы «Лукойлға» қарайды.

Бұған дейін Қазақстан билігі 2033 жылы аяқталатын Теңіз кен орнын игеру жөніндегі келісімді ұзарту мәселесі бойынша Chevron компаниясымен алдын ала келіссөз бастағаны хабарланған еді.

Теңіз кен орны ел экономикасы үшін стратегиялық маңызға ие. Сарапшылардың бағалауынша, бұл жоба Қазақстанның жалпы ішкі өнімінің елеулі бөлігіне ықпал етеді. Сонымен қатар мұнда мұнай өндіру көлемі тәулігіне шамамен 1 миллион баррельге жуықтайды.

Сол себепті Теңіз жобасы Қазақстан мен АҚШ арасындағы ұзақмерзімді энергетикалық әріптестіктің маңызды бөлігі саналады.