Қазақстан Премьер-лигасы аясында Шымкентте өткен «Ордабасы» мен «Атырау» арасындағы матч төрешілік шешімдерге байланысты қызу талқылауға ұласты, -деп хабарлайды «Dalamedia» ақпараттық порталы.

Қажымұқан Мұңайтпасов атындағы стадионда өткен кездесуде ойын тізгінін алаң иелері ұстағанымен, есепті алғаш болып қонақтар ашты. 20-минутта «Атырау» жылдам қарсы шабуыл ұйымдастырып, Константин Дорофеев мергендігімен көзге түсті – 0:1.

Осыдан кейін «Ордабасы» шабуылды үдеткенімен, гол соғу оңайға соқпады. Ең қауіпті сәттердің бірінде Ги-Марселин Киламаның соққысы бағанаға тиіп, есеп өзгеріссіз қалды.

Екінші таймда да ойын қыза түсті. «Атырау» тағы бір мәрте гол соққанымен, VAR тексерісінен кейін ол есепке алынбады. Матчтың шешуші сәті қосымша уақытта орын алды. 101-минутта бас төреші Санжар Ысқақов «Атырау» қақпасына пенальти белгілеп, Эльхан Астанов мүмкіндікті мүлт жібермеді – 1:1.

Кездесудің соңғы минуттары тартысқа толы өтті. Қосымша уақытта қызыл қағаз көрсетіліп, ойын барысында қатаң қақтығыстар мен эмоцияға толы эпизодтар жиіледі.

Осы тең нәтижеден кейін «Ордабасы» 8 ұпаймен турнир кестесінде алға шықса, «Атырау» 4 ұпаймен төменгі бөлікте қалды.

Матчтан кейін «Атырау» клубының бас менеджері Мақсат Тұмалиевтің денсаулығы сыр беріп, ауруханаға жеткізілгені белгілі болды. Дәрігерлер оның қан қысымы көтерілгенін айтқан. Соған қарамастан, ол команда ойынына ризашылығын білдірген.

Бейресми деректерге сәйкес, кездесудің бас төрешісіне қатысты қатаң шешім қабылдануы мүмкін. Бұл мәселені ҚФФ-ның тиісті департаменті қарастырып жатқаны айтылады.

Ойыннан кейін әлеуметтік желіде де қызу пікірталас басталды. Тіпті «Ордабасы» жанкүйерлерінің өзі қарсылас команданы жеңіске лайық деп бағалап, кешірім сұраған жазбалар қалдырды. Олар төрешілікке наразылық білдіріп, «Атырауға» жасалған әділетсіздік туралы ашық жазды.