Түркістан облысы Мақтаарал ауданындағы мектеп түлегі Нұрәлі Медина Бектұрсынқызы әлемнің жетекші жоғары оқу орындарынан 80-нен астам шақырту алып, жоғары академиялық деңгейін дәлелдеді, — деп хабарлайды «Dalamedia» ақпараттық порталы.

АҚШ, Канада, Ұлыбритания, Түркия, Біріккен Араб Әмірліктері мен Еуропадағы беделді университеттер талапкердің оқу үлгерімімен қатар, көшбасшылық қасиеттері мен қоғамдық белсенділігін жоғары бағалап, түрлі білім беру және гранттық бағдарламаларын ұсынған.

Түлек халықаралық IELTS және SAT емтихандарын сәтті тапсырып, шетелдің алдыңғы қатарлы университеттерінде білім алуға қажетті дайындық деңгейін көрсетті.

Мектепте оқып жүрген кезінде Нұрәлі Медина білім мен ғылым бағытындағы түрлі жобаларға белсенді қатысып, үздіктер қатарынан көрінді. Ол ағылшын тілі пәні бойынша өткен республикалық ғылыми-шығармашылық конференцияда «Жасанды интеллект – ғылыми зерттеудің жаңа мүмкіндіктері» тақырыбымен І орын иеленген. Сонымен қатар республикалық «Ой зерек» олимпиадасының жеңімпазы атанған.

Қазіргі таңда талапкер өзіне ұсынылған көптеген оқу орындарының ішінен Inha University университетінде білім алуға ниетті. Болашақта халықаралық деңгейде тәжірибе жинап, алған білімі мен білігін ел дамуына бағыттауды мақсат етіп отыр.