АҚШ пен Венесуэланың уақытша билігі дипломатиялық және консулдық қатынасты қайта орнату бойынша келісімге келді, — деп хабарлайды «Dalamedia» ақпараттық порталы «Reuters» агенттігіне сілтеме жасап.

АҚШ-тың Мемлекеттік департаментінің (Сыртқы істер министрлігі) мәліметінше, бұл қадам екі елдегі тұрақтылықты нығайтып, экономиканы қалпына келтіруге және саяси бітімге қол жеткізуге бағытталған. Министрлік өкілдерінің айтуынша, олар Венесуэла халқының бейбіт әрі демократиялық жолмен жаңа үкіметке өтуін қалайды.

Венесуэла тарапынан таратылған ресми хабарламада екі ел жаңа қарым-қатынаста өзара құрметке, тең егемен құқыққа және халық арасындағы ынтымақтастыққа сүйене отырып, конструктивті диалог жүргізуге дайын екені айтылған. «Бұл үрдіс түсіністікті күшейтіп, өзара тиімді ынтымақтастық мүмкіндіктерін ашады», — делінген құжатта.

Айта кетейік, АҚШ пен Венесуэла арасындағы дипломатиялық қатынастар 2019 жылы үзіліп, кейінгі жылдары саяси шиеленіс бірнеше рет өрши түскен. Енді екі тарап дипломатиялық миссияларды қайта ашу арқылы байланысты қалпына келтіруге бет алған.