Стендап-комик Нұрлан Сабуровтың Ресейге қайта кіруіне қойылған шектеулер оның саяси ұстанымына байланысты қайта қаралуы мүмкін. Бұл туралы Мәскеудегі құқық қорғау орталығының басшысы, адвокат Александр Хаминский мәлімдеді.

Адвокаттың айтуынша, егер Сабуров Ресейдің саясатына қатысты көзқарасын өзгертіп, оны жария түрде білдірсе, құзырлы органдарға елге кіруге салынған тыйымды алып тастауы немесе оның мерзімін қысқарту жөнінде өтініш беруге мүмкіндігі бар. Оның сөзінше, бұл — шектеуді жоюдың ең ықтимал жолы.

Айта кетейік, Нұрлан Сабуровқа қатысты қабылданған шешімге оның Ресейдің Украинаға қарсы соғысын ашық сынға алуы, Ресейге қарсы мәлімдемелері, сондай-ақ көші-қон және салық заңнамасын бірнеше рет бұзуы себеп болған.

Сонымен қатар адвокат Сабуровтың Ресейге кіре алмауы оның азаматтық немесе мүліктік құқықтарының шектелгенін білдірмейтінін атап өтті. Мәселен, ол Мәскеу облысындағы жылжымайтын мүлкін сата алады.

Бұл пікірді адвокат Евгения Сабитова да құптады. Оның айтуынша, Сабуров салық есептілігін тапсырып, міндетті төлемдерді уақытында өтеп отырса, Ресей аумағындағы бизнес қызметін заңды түрде жалғастыра алады.

— Жеке тұлғаның елге кіруіне тыйым салынуы салық органдарының кәсіпкерлік субъектіні автоматты түрде жабуына негіз болмайды, — деді ол.

Сондай-ақ, Сабитова тыйым салынғанына қарамастан, Сабуровтың Ресейде мүлік иелену құқығы сақталатынын жеткізді.

Айта кетейік, бұған дейін ресейлік ақпарат құралдарында қазақстандық әзілкешке Ресейге 50 жылға дейін кіруге тыйым салынғаны жөнінде мәлімет тараған болатын.