Нипах вирусының таралу қаупіне байланысты бірқатар ел Үндістаннан келетін жолаушыларға санитарлық бақылауды күшейтті. Бұл туралы BBC хабарлады.

Қазақстанның Денсаулық сақтау министрлігі Үндістан мен Оңтүстік-Шығыс Азия елдерінен келетін азаматтарға қатысты шекарадағы санитарлық-карантиндік бақылау күшейтілгенін мәлімдеді. Осындай шаралар Қырғызстан мен Өзбекстанда да енгізілді.

Қырғызстанның Денсаулық сақтау министрлігінің мәліметінше, елде вирус жұқтыру жағдайы тіркелмеген. Ведомство денсаулық сақтау жүйесі ықтимал эпидемиологиялық қауіптерге дайын екенін атап өтті. Өзбекстан билігі де аурудың елге ену ықтималдығы өте төмен екенін хабарлады.

Сонымен қатар, Таиланд Батыс Бенгалиядан келетін рейстерді қабылдайтын үш әуежайда тексеруді бастады. Непал Катманду әуежайында және Үндістанмен шекаралас құрлық өткелдерінде бақылауды күшейтті.

Айта кетейік, бұған дейін Үндістанда Нипах вирусына байланысты шұғыл эпидемиологиялық шаралар енгізілген болатын.