Украинада президенттік сайлау өткізу мәселесі қайта көтерілді. Владимир Зеленскийдің айтуынша, елде сайлау тек бір жағдайда ғана мүмкін: соғыс қимылдары тоқтап, дауыс беру кезеңінде қауіпсіздік толық қамтамасыз етілсе ғана. Еске сала кетейік. бұған дейін АҚШ президенті Дональд Трамп Украинада жаңа сайлау өткізуді қолдайтынын айтып, Зеленскийдің жеңіске тағы бір мүмкіндігі бар екенін меңзеген еді.

Ал Зеленский, егер қауіпсіздік шарттары орындалса, алдағы екі-үш айда сайлау ұйымдастыруға дайын екенін мәлімдеді. Оның айтуынша, басты талап халықтың дауыс беруге қорықпай баруы және ешқандай қауіпсіздік қатері болмауы.

Бұл туралы ол 11 желтоқсанда онлайн форматта өткен халықаралық жиында айтты.

Зеленский қазіргі жағдайда басты мәселе - демократия емес, халықтың қауіпсіздігі екенін атап өтті. Оның сөзінше, егер сайлау өткізуге нақты сұраныс болса, кем дегенде дауыс беру кезеңінде атысты уақытша тоқтату мәселесін қарастыру керек. Бұл бағытта АҚШ-тың, әсіресе Вашингтонның Ресеймен келіссөз жүргізу арқылы ықпал ете алатынын жеткізді.

Жалпы, Украинада кезекті президенттік сайлау 2024 жылы өтуі тиіс еді. Алайда соғыс басталғалы бұл үрдіс кейінге қалдырылған болатын.