Себеп: Түркияда сот әлеуметтік желідегі “ұнады” белгісін қоюды некедегі сенімді бұзатын әрекет деп таныды. Бұл шешім Кайсери қаласында қаралған ерлі-зайыптының дауына байланысты қабылданған.

Іс материалдарына сәйкес, әйел жұбайының өзіне қаржылай қолдау көрсетпейтінін, жиі қорлайтынын және басқа әйелдердің суреттеріне тұрақты түрде “лүпіл” басатынын жеткізген. Ал ер адам, керісінше, әйелінің себепсіз қызғаныш танытып, өзіне ауыр сөз айтатынын айтқан.

Сот екі тараптың уәжін саралай келе, ер адамды кінәлі деп тауып, әйелдің пайдасына шешім шығарды. Бұл істе “лүпіл” басу әрекеті негізгі дәлелдердің бірі ретінде қолданылған.

Осы шешімнен кейін Түркияда әлеуметтік желідегі мұндай әрекеттер ажырасу үрдісінде “некедегі сенімді бұзу белгісі” ретінде қаралуы мүмкін екені айтылады.