АҚШ президенті Дональд Трамп Truth Social әлеуметтік желісінде Иранмен келісімге келгенін мәлімдеді, деп хабарлайды «Dalamedia» ақпараттық порталы.

Оның айтуынша, Иран Ислам Республикасымен келісім жасау жұмыстары толық аяқталған. Трамп бұл жаңалықты «баршаңызды құттықтаймын» деген сөздермен бастап, Ормуз бұғазының ашылатынын және теңіз блокадасының дереу алынып тасталатынын жазған.

«Әлем кемелері, қозғалтқыштарыңызды іске қосыңыздар. Мұнай қайтадан аға бастасын», – деп жазды АҚШ президенті.

Ақ үй басшысы бұл келісімнің аймақта бейбітшілік пен тұрақтылық орнатуға жол ашатынын атап өтті. Оның сөзінше, тиісті құжатқа 19 маусымда қол қойылады.

Трамп сондай-ақ бұрынғы президенттердің Иранмен бейбіт келісімге қол жеткізе алмағанын айтып, бұл оқиғаны тарихи жетістік деп бағалаған. Оның пікірінше, бұғаздың ашылуы мен келісімге қол қойылғаннан кейін аймақтағы мұнай тасымалы қайта жанданып, қауіпсіздік деңгейі артады.