АҚШ президенті Дональд Трамп Иранмен бейбіт келісімге қатысты меморандум шарттары негізінен келісілгенін мәлімдеді. Оның айтуынша, құжат Ормуз бұғазы арқылы кеме қатынасын қайта қалпына келтіру мәселесін де қамтиды, ,-деп хабарлайды «Dalamedia» ақпараттық порталы.

Трамп әлеуметтік желідегі жазбасында келісімнің соңғы тармақтары әлі талқыланып жатқанын, толық ақпарат алдағы күндері жарияланатынын айтты.

Reuters таратқан мәліметке сәйкес, ұсынылып отырған келісім үш кезеңнен тұруы мүмкін: соғысты ресми түрде тоқтату, Ормуз бұғазындағы жағдайды реттеу және 30 күндік кең ауқымды келіссөздер кезеңін бастау.

Иран тарапы Ормуз бұғазына бақылау, АҚШ санкцияларын алып тастау және порттарға қойылған шектеулерді жою мәселелерін көтеріп отыр. Сонымен бірге Тегеран ядролық қару жасау ниеті жоқ екенін айтып, уранды тек азаматтық мақсатта байытуға құқығы бар екенін мәлімдеді.

Пәкістанның делдалдығымен өтіп жатқан келіссөздерде тараптар белгілі бір ілгерілеу бар екенін жеткізген. Пәкістан армиясының мәліметінше, соңғы талқылаулар түпкілікті түсіністікке жақындауға үміт береді.

АҚШ мемлекеттік хатшысы Марко Рубио Вашингтонның негізгі ұстанымдарын тағы да атап өтіп, Иранда ядролық қару болмауы тиіс, Ормуз бұғазы ашық болуы қажет және байытылған уран тапсырылуы керек екенін айтты.

Ал Иран тарапы атысты тоқтату режимі сақталғанымен, келіссөздерде әлі де шешілмеген мәселелер бар екенін жеткізді.