АҚШ президенті Дональд Трамп 15 ақпанда Truth Social әлеуметтік желісінде Бейбітшілік кеңесіне мүше елдердің Газаға гуманитарлық көмек көрсетіп, миллиардтаған доллар қаржы бөлуге уәде еткенін хабарлады. «Бейбітшілік кеңесінің әлеуеті шексіз», – деп жазды Ақ үй басшысы.

Трамп былтыр қазан айында Газа қақтығысын түбегейлі тоқтату жоспарын ұсынған. Бұл тұжырымдама Біріккен Ұлттар Ұйымының Қауіпсіздік Кеңесі тарапынан бірауыздан мақұлданған. Сондай-ақ ол гуманитарлық көмектің жылдам жеткізілгенін және барлық кепілге алынғандардың босатылғанын атап өтті.

«Бір ай бұрын Швейцарияның Давос қаласында жиырмаға жуық беделді құрылтайшы менімен бірге Кеңестің ресми құрылуын атап өтті. Сол жерде Газа тұрғындарына, кейіннен Газа аумағынан тыс жерлерде де бейбіт тұрғындарға көмек көрсету жөніндегі тұжырымдаманы таныстырдық», – деді ол.

АҚШ Президенті 19 ақпанда Вашингтондағы Дональд Дж. Трамп Бейбітшілік институтында кеңес мүшелерімен қайта кездеспек. Басқосуда Газаға гуманитарлық көмек пен қалпына келтіру жұмыстарын қаржыландыруға 5 миллиард доллардан астам қаражат бөлуге уәде беретінін айтпақ. Сондай-ақ Газа тұрғындарының қауіпсіздігін қамтамасыз ету үшін Халықаралық тұрақтандыру күштері мен жергілікті полиция құрамына мыңдаған қызметкер жіберілетін болады.

Трамп Бейбітшілік кеңесінің тарихтағы ең маңызды халықаралық органға айналатынын, оның төрағасы болу үлкен мәртебе екенін атап өтті.