Жапонияның солтүстік-шығыс жағалауында бүгін магнитудасы 7,4–7,5 аралығында болған жер сілкінісі тіркелді. АҚШ Геологиялық қызметінің дерегінше, жер асты дүмпуі Мияко қаласынан шығысқа қарай, теңіз аумағында шамамен 35 шақырым тереңдікте болған, ,-деп хабарлайды «Dalamedia» ақпараттық порталы.

Жер сілкінісінен кейін Жапония метеорологиялық агенттігі цунами қаупі бар екенін ресми түрде ескертті. Мамандардың айтуынша, жағалауға соғуы мүмкін толқындардың биіктігі 3 метрге дейін жетуі ықтимал.

Ескерту Ивате, Аомори және Хоккайдо аймақтарына қатысты жарияланған. Билік тұрғындарды жағалаудан дереу кетіп, қауіпсіз биік жерлерге көшуге шақырды.

Жер сілкінісінің дүмпуі ел астанасы Токиода да сезілген. Ал Аомори өңірінде жоғары жылдамдықты пойыздардың қозғалысы уақытша тоқтатылды.

Қазіргі таңда қаза тапқандар мен зардап шеккендер туралы ресми мәлімет түскен жоқ. Құтқару қызметтері жағдайды бақылауға алып, жедел әрекет ету топтарын іске қосты. Сонымен қатар, инфрақұрылымға келуі мүмкін залалдар тексеріліп жатыр.