Қазақстандық теннисші Елена Рыбакина Australian Open турнирінде тарихи жеңіске жетіп, қомақты қаржылай сыйақыға ие болды.

Турнирдің ақтық финалында Рыбакина әлемнің бірінші ракеткасы, Беларусь өкілі Арина Соболенконы үш сетке созылған тартысты матчта жеңді. Қорытынды есеп — 6:4, 4:6, 6:4.

Ұйымдастырушылардың мәліметінше, әйелдер арасындағы жекелей сында чемпион атанған теннисші 4 миллион 150 мың аустралиялық доллар көлемінде сыйақы алады. Салықты есептемегенде бұл сома шамамен 1 миллиард 472 миллион теңгеге тең.

Ал финалға дейін жетіп, екінші орын алған Арина Соболенко 2 миллион 150 мың аустралиялық доллар (шамамен 763 миллион теңге) табыс тапты.

Бұл жеңіс Елена Рыбакинаның WTA рейтингіндегі жағдайына да оң әсерін тигізді. Ол турнир қорытындысы бойынша 2000 рейтингтік ұпай жинап, бірден бесінші орыннан үшінші сатыға көтерілді.

Айта кетейік, бұған дейін Рыбакина 2025 жылдың қараша айында өткен WTA қорытынды турнирінде жеңіске жетіп, 5 миллион 235 мың АҚШ доллары (шамамен 2,7 миллиард теңге) көлемінде сыйақы алған болатын.