«Қайрат» футбол клубының шабуылшысы Дастан Сәтбаев алдағы матчтарда команда сапындағы соңғы ойындарын өткізеді, ,-деп хабарлайды «Dalamedia» ақпараттық порталы. Жас футболшы бұдан кейін лондондық «Челси» клубына ауысады.

Алматылық клубтың мәліметіне сәйкес, 13 және 17 маусым күндері Қазақстан Премьер-лигасы аясында өтетін «Атырау» және «Қызылжарға» қарсы кездесулер Сәтбаев үшін «Қайрат» сапындағы соңғы матчтар болмақ. Осы ойындардан кейін ол Лондонға аттанады.

Клуб өкілдері «Қызылжарға» қарсы ойыннан соң Алматыдағы Орталық стадионда футболшымен арнайы қоштасу рәсімі өтетінін де хабарлады. Бұл сәт сары-қара жейдедегі оның соңғы ойындарымен тұспа-тұс келмек.

Айта кетейік, Дастан Сәтбаевтың «Челси» клубына ауысуы 2025 жылдың ақпан айында рәсімделген. Сол кезде жасалған келісімге сәйкес, ойыншы кәмелет жасына толған соң ғана Англияға жол тартатыны айтылған.

Бұған дейін танымал инсайдер Фабрицио Романо бұл трансферді Қазақстан футболы тарихындағы ірі мәмілелердің бірі деп атап, «Қайрат» клубының шамамен 4 миллион еуро табыс табатынын хабарлаған.

Сәтбаев «Қайрат» академиясының түлегі ретінде негізгі құрамға ерте араласып, небәрі 16 жасында дебют жасаған. Қазір оның еншісінде Қазақстан чемпионатындағы 19 гол, Чемпиондар лигасының іріктеу және негізгі кезеңдеріндегі нәтижелі ойындар, екі чемпиондық атақ және ұлттық құрама тарихындағы ең жас гол авторы деген жетістік бар.

Футболшының өзі де «Қызылжарға» қарсы кездесу оның Қазақстан чемпионатындағы соңғы ойыны болатынын бұған дейін мәлімдеген еді.