Алматылық «Қайраттың» шабуылшысы Дастан Сәтпаевтың жейдесі Будапештте Чемпиондар лигасының финалы қарсаңында ұйымдастырылған арнайы көрмеге қойылды, -деп хабарлайды «Dalamedia» ақпараттық порталы.

Атақты футболшылардың жейделері топтастырылған инсталляция Венгрия астанасының орталығындағы Батырлар алаңында орналасқан. Көрмеге Давид Луис, Иван Перишич, Кевин де Брюйне сынды танымал ойыншылардың жейделерімен қатар Дастан Сәтпаевтың қолтаңбасы қойылған жейдесі де енгізілген.

Бұл туралы Қазақстан ұлттық құрамасының баспасөз хатшысы Әлімжан Асқар әлеуметтік желіде бөліскен.

Айта кетейік, 17 жастағы шабуылшы Чемпиондар лигасының негізгі кезеңінде гол соғып, тарихи жетістікке қол жеткізген алғашқы қазақстандық футболшылардың бірі атанды. Сондай-ақ ол турнир тарихындағы ең жас гол авторларының қатарынан орын алып отыр.

Биылғы Чемпиондар лигасының финалында ПСЖ мен лондондық «Арсенал» кездеседі. Шешуші ойын 30 мамыр күні Будапешттегі «Пушкаш Арена» стадионында өтеді.