Қазақстандық қақпашы Темірлан Анарбековке Еуропаның бірқатар клубтары қызығушылық танытып отыр. Лиссабонның “Спортинг” пен “Бенфика” командалары ойыншы үшін шамамен 2,5 миллион еуро төлеуге дайын екені айтылды,-деп хабарлайды «Dalamedia» ақпараттық порталы.

Бұл мәліметті журналист Ермұхамед Мәулен таратты. Оның дерегінше, португалиялық екі клуб қазақстандық қақпашыны өз сапына қосу мүмкіндігін қарастырып, трансферге қатысты нақты ұсыныс әзірлеуге кіріскен.

Анарбековке деген қызығушылықтың артуына оның биылғы Чемпиондар лигасындағы сенімді ойыны себеп болып отыр. Әсіресе “Қайраттың” іріктеу кезеңіндегі маңызды матчтарда ол жоғары деңгейде өнер көрсетіп, командасына үлкен қолдау көрсетті.

Шешуші сәттердің бірі “Селтикке” қарсы өткен ойын болды. Сол кездесуде Темірлан пенальти сериясында үш бірдей соққыны қайтарып, “Қайраттың” жарыстың негізгі кезеңіне жолдама алуына зор үлес қосты.

Негізгі кезеңде де жас қақпашы өз тұрақтылығын сақтап қалды. Ол Чемпиондар лигасында алты матчқа қатысып, қақпасынан 13 гол жібергенімен, бірнеше ойында жасаған әсерлі сейвтері арқылы Еуропа мамандарының назарына ілікті.

Сонымен қатар, Анарбеков УЕФА нұсқасы бойынша бір матчтың үздік ойыншысы атанған алғашқы қазақстандық футболшы ретінде тарихқа енді. Бұл жетістік оның халықаралық деңгейдегі беделін арттырып қана қоймай, қазақстандық футболшылардың да Еуропада өзін дәлелдеуге қауқарлы екенін көрсетті.