Комиссия мүшесі Ләззат Сүйіндіктің айтуынша, «Республикалық референдум туралы» заңға сәйкес, референдум қарсаңындағы күн мен дауыс беру өтетін күні үгіт жүргізуге тыйым салынады.

Оның сөзінше, үгіт-насихат жұмыстары бүгін түнгі сағат 00:00-де тоқтайды. Осы сәттен бастап «тыныштық күні» басталып, 14 және 15 наурызда кез келген үгітке шектеу қойылады. Алайда бұған дейін ілінген үгіт материалдары сол орнында қала береді.

Бұл талапты бұзған азаматтар әкімшілік құқық бұзушылық туралы кодекске сәйкес жауапкершілікке тартылады.

Сондай-ақ дауыс беру күні сайлау учаскелерінде қоғамдық пікірге сауалнама жүргізуге рұқсат етілмейді. Азаматтардың пікірін тек учаскеден шыққаннан кейін, Орталық референдум комиссиясын хабардар еткен заңды тұлғалар ғана сұрай алады. Олардың тізімі ресми сайтта жарияланған.

Айта кетейік, учаскелерде фото және бейнетүсірілім жасауға тек бақылаушылар мен бұқаралық ақпарат құралдарының өкілдеріне ғана рұқсат беріледі. Бұл ретте олар дауыс беру құпиясын сақтап, азаматтардың жеке деректерінің қорғалуына нұқсан келтірмеуі және комиссия мүшелерінің жұмысына кедергі келтірмеуі тиіс.