Елімізде 14 наурызда заңмен белгіленген тыныштық күні басталады. Орталық референдум комиссиясының төрағасы Нұрлан Әбдіровтің айтуынша, бұл күні кез келген үгіт-насихатқа қатаң тыйым салынған.

«Үгіт-насихат жүргізуге болмайды. Тыныштық күні – нағыз тыныштық күні. Егер кейбір жерлерде үгіт материалдары ілінген болса, олар алынып тасталмайды, бірақ таратуға болмайды», – деді Әбдіров. Сонымен қатар бұл тыйым әлеуметтік желілерге де қатысты. «Үгіт материалдарын жариялауға, белсенді жұмыс жүргізуге болмайды», – деді комиссия төрағасы. Сондай-ақ референдум күні сауалнама жариялауға тыйым салынады.

Ережені бұзған азаматтар мен ұйымдар Әкімшілік құқық бұзушылықтар кодексінің «тыйым салынған кезеңде сайлау алдындағы үгіт жүргізу» бабына сәйкес жауапқа тартылады.

Айыппұл мөлшері келесідей:

• Жеке тұлғаларға – 15 АЕК (55 380 теңге);

• Шағын бизнес пен коммерциялық емес ұйымдарға – 20 АЕК (73 840 теңге);

• Орта бизнес субъектілеріне – 25 АЕК (92 300 теңге);

• Ірі бизнеске – 35 АЕК (129 220 теңге).

Бұған дейін бас прокуратура референдумға қатысты сауалнама жүргізген бірнеше азаматқа айыппұл салынғанын еске салған еді.