Конституциялық реформа жөніндегі комиссияның отырысында Мәжіліс депутаты Сергей Пономарёв өлім жазасына қатысты ұсыныс жасады.

Депутат адам құқықтары жөніндегі уәкіл Артур Ластаевтың «өмір сүру құқығының абсолютті сипатын Конституция арқылы бекіту қажет» деген пікірін қолдады. Пономарёвтің ұсынысы бойынша:

• «Өмір сүру құқығы – әрбір адамның абсолютті әрі ажырамас құқығы. Ешкімнің өз бетінше адам өмірін қиюға құқығы жоқ».

• «Өлім жазасына тыйым салынады».

Оның айтуынша, бұл норма Ата заңның гуманистік сипатын күшейтіп, «Әділетті Қазақстан» қағидатының мазмұнын нақтылай түседі.

Айта кетейік, Конституцияның 77-бабына түзету енгізу жоспарланып отыр, бұл мәтіннің 84%-ына өзгерістер әкеледі. Жаңартылған жобада Преамбула, 11 бөлім және 104 бап қамтылған, сонымен қатар «Халық кеңесі» мен «Конституцияға өзгерістер мен толықтырулар енгізу» атты екі жаңа бөлім қосылған, тағы 4 бөлімнің атауы өзгертілген.