Бишімбаев ісінде мемлекеттік айыптаушы болған прокурор Айжан Аймағанова «Әділет» партиясынан депутаттыққа кандидат ретінде ұсынылды. Осыған байланысты ол прокуратура органдарындағы қызметінен кеткенін мәлімдеді, -деп хабарлайды «Dalamedia» ақпараттық порталы.

Бұл туралы Айжан Аймағанова өзінің Instagram парақшасында жазды. Оның айтуынша, соңғы күндері әлеуметтік желілерде депутаттыққа кандидат ретінде ұсынылғаны туралы ақпарат кеңінен талқыланып жатыр. Осыған байланысты ол жұртшылыққа ресми түсініктеме беруді жөн көрген.

Аймағанова прокуратура саласында ұзақ жыл қызмет атқарып, заң үстемдігін қамтамасыз ету мен азаматтардың құқықтарын қорғау бағытында еңбек еткенін атап өтті. Сондай-ақ депутаттыққа кандидат ретінде ұсынылуына байланысты прокуратурадағы қызметінен өз еркімен кеткенін айтып, бұл заң талаптарына толық сәйкес қабылданған шешім екенін жеткізді.

Оның сөзінше, бұл – саналы түрде жасалған таңдау. Айжан Аймағанова кәсіби тәжірибесі мен білімін заң шығару ісінде және азаматтарды толғандыратын өзекті мәселелерді шешуге бағыттағысы келетінін айтты.

Сондай-ақ ол өзіне қолдау білдіріп, пікір қалдырған азаматтарға алғыс айтып, алдағы уақытта ашық диалогқа дайын екенін жеткізді.