Оқу-ағарту министрі Жұлдыз Сүлейменоваға қатысты Президенттің атына жолданған ұжымдық арыздың мазмұны жария болды, деп хабарлайды «Dalamedia» ақпараттық порталы.

Өздерін министрліктің қазіргі және бұрынғы қызметкерлері ретінде таныстырған авторлар құжатта министрдің қызметінен кетуін сұрап, ведомстводағы кадрлық саясат пен басқару тәсіліне қатысты бірқатар сын-пікір білдірген.

Редакцияға түскен материалда министрліктегі моральдық-психологиялық ахуалдың нашарлағаны, қызметкерлерге қысым жасалатыны және кадрлық шешімдерге байланысты тұрақсыздық бар екені айтылған. Сондай-ақ жұмыс барысындағы жүктеменің артуы мен кей жағдайларда кешкі уақытқа дейін жұмыс істеу талап етілетіні де көрсетілген.

Құжатта министр Жұлдыз Сүлейменова қызметке келгеннен кейін ұжымдағы атмосфера өзгергені, басшылық құрам арасында қысым мен сенімсіздік күшейгені жөнінде пікірлер келтірілген. Авторлар министрдің жұмыс стиліне де тоқталып, жиналыстар кезінде сынның қатқыл айтылатынын және бұл жағдай ұжым ішіндегі көңіл-күйге әсер етіп отырғанын алға тартады.

Арызда сондай-ақ кадрлық саясатқа қатысты алаңдаушылық білдіріліп, басшылық құрамға жүйелі қысым жасалатыны айтылған. Құжат авторлары мұны министрліктегі тұрақтылыққа кері әсер етіп отырған факторлардың бірі ретінде сипаттайды.

Қазіргі уақытта бұл арызға қатысты ресми органдар тарапынан түсініктеме берілген жоқ.