Мемлекет басшысы Қасым-Жомарт Тоқаев Қытай Халық Республикасының Төрағасы Си Цзиньпинге туған күніне орай құттықтау жеделхатын жолдады ,-деп хабарлайды «Dalamedia» ақпараттық порталы.

Президент өз хатында Си Цзиньпиннің Қазақстан мен Қытай арасындағы мызғымас достыққа, тату көршілікке және өзара қолдауға негізделген жан-жақты стратегиялық әріптестікті нығайтуға зор үлес қосып келе жатқанын атап өткен.

Мемлекет басшысы екі ел арасындағы байланыстардың соңғы жылдары қарқынды дамып, сауда-экономикалық, мәдени-гуманитарлық және өңіраралық бағыттарда жаңа деңгейге көтерілгенін де тілге тиек етті.

Сондай-ақ Тоқаев Қазақстан мен Қытай арасындағы қазіргі «алтын отызжылдық» кезеңінде ынтымақтастық бұдан әрі де нығайып, жаңа бағыттармен толыға түсетініне сенім білдірді.

Қасым-Жомарт Тоқаев Си Цзиньпинге мемлекеттік қызметінде табыс тілеп, достас Қытай халқына бақ-береке тіледі.