Қазақстан Президенті Қасым-Жомарт Тоқаев Америка Құрама Штаттарының Президенті Дональд Трампқа туған күніне орай құттықтау жеделхатын жолдады, ,-деп хабарлайды «Dalamedia» ақпараттық порталы.
Мемлекет басшысы өз құттықтауында Дональд Трампты туған күнімен құттықтап, Қазақстан мен АҚШ арасындағы кеңейтілген стратегиялық серіктестікті одан әрі нығайтуға ниетті екенін жеткізді.
Сондай-ақ ол екі ел арасындағы жоғары деңгейдегі саяси диалогтың маңызын атап өтіп, сауда-экономикалық және инвестициялық ынтымақтастықтың даму қарқынына тоқталды.
Президент Қазақстанның бейбітшілікті сақтау, өзара түсіністік пен орнықты дамуды ілгерілету бағытындағы бірлескен жұмысты жалғастыруға дайын екенін растады.
Қасым-Жомарт Тоқаев Дональд Трампқа зор денсаулық, бақ-береке тілеп, АҚШ халқының игілігі жолындағы жауапты мемлекеттік қызметіне табыс тіледі.
Айта кетейік, Дональд Трамп 14 маусымда 80 жасқа толды. Ол туған күнін ерекше форматта атап өтуімен танымал. Биылғы мерейтой да ерекше жоспармен есте қалмақ.
АҚШ президенті бұл күнді Ақ үй аумағында өтетін UFC турнирімен атап өтуді көздеп отыр. Осыған байланысты Ақ үйдің оңтүстік көгалына уақытша сегіз қырлы октагон орнатылып, мыңдаған көрерменге арналған алаң дайындалған.
Сондай-ақ Трамптың туған күні тек биыл ғана емес, бұған дейін де ауқымды іс-шаралармен өткен. 2024 жылы ол сайлау науқаны кезінде Флоридада жақтастарымен кездесу өткізсе, 1996 жылы 50 жылдығын Нью-Йорктегі Trump Tower-де атап өткен.
Ал 1993 және 1988 жылдардағы мерейтойлары да сән-салтанатымен есте қалған: тарихи тақырыптағы кештер, алып торттар мен ерекше шоулар ұйымдастырылған.
Дональд Трамптың мерейтойлары жылдар бойы тек жеке оқиға емес, көпшілік назарын аудартатын ірі шараларға айналып келеді.
Санаттар
DALAMEDIA admin
