Президент Қасым-Жомарт Тоқаев Қазақстан халқының бірлігі күніне орай ел тұрғындарына құттықтау жолдап, бұл мерекенің қоғам үшін айрықша мәнге ие екенін атап өтті, -деп хабарлайды «Dalamedia» ақпараттық порталы.

Мемлекет басшысы өз құттықтауында бұл күннің ел ішіндегі татулық пен тұрақтылықты айшықтайтын маңызды мейрам екенін айтты. Оның сөзінше, тағдыр тоғыстырған түрлі этнос өкілдері бүгінде Қазақстанды ортақ шаңырақ санап, бір үйдің баласындай тату-тәтті өмір сүріп келеді.

Тоқаев қоғамдағы бірлік пен бейбіт өмірдің Конституцияда да ерекше көрініс тапқанын еске салды. Ол мұның бәрі қазақстандықтардың саналы таңдауы екенін атап өтіп, азаматтардың барлығына тең мүмкіндік берілетін әділетті әрі тұрақты қоғамда өмір сүруге ұмтылатынын жеткізді.

Құттықтау соңында Президент барша отандастарға зор денсаулық, амандық және береке тіледі.