Президент Қасым-Жомарт Тоқаев АҚШ Президентінің Орталық Азия бойынша арнайы өкілі Серджио Гормен кездесті, — деп хабарлайды «Dalamedia» ақпараттық порталы.

Кездесу барысында Мемлекет басшысы Қазақстан мен АҚШ арасындағы қарым-қатынастың жоғары деңгейде дамып келе жатқанын атап өтіп, кеңейтілген стратегиялық серіктестікті одан әрі нығайтуға еліміздің мүдделі екенін жеткізді.

Қасым-Жомарт Тоқаев маңызды минералдар бойынша C5+1 диалогына Серджио Гордың қатысуын жоғары бағалап, бұл Вашингтонның Қазақстан мен жалпы Орталық Азиямен ынтымақтастыққа айрықша мән беретінін көрсететінін айтты. Сондай-ақ Президент арнайы өкілдің екіжақты байланысты дамытуға қосқан үлесін атап өтті.

Мемлекет басшысы осы орайда АҚШ Президенті Дональд Трампқа жылы лебізі мен ізгі тілегін жолдап, жыл соңына дейін кездесуге ниетті екенін білдірді. Сонымен бірге Майамиде өтетін G20 саммитіне шақырғаны үшін алғыс айтты.

Өз кезегінде Серджио Гор кездесу үшін ризашылығын білдіріп, Дональд Трамптың сәлемін жеткізді. Оның айтуынша, Ақ үй Қазақстанмен өзара тиімді әріптестікті дамытуға ерекше назар аударып отыр.

Арнайы өкілдің мәліметінше, соңғы бір жылда АҚШ пен Орталық Азия елдері арасында 20 миллиард доллардан астам келісімдер жасалған. Бұл көрсеткіш алдағы уақытта да өсетініне сенім білдірді. Сондай-ақ ол Қасым-Жомарт Тоқаевтың G20 саммитіне қатысатынына қуанышты екенін жеткізді.

Келіссөздер барысында тараптар сауда-экономикалық және инвестициялық жобаларды жүзеге асыру, сондай-ақ аса маңызды минералдар, көлік-логистика, цифрландыру және басқа да басым бағыттардағы ынтымақтастықты дамыту мәселелерін талқылады.

Сондай-ақ Қазақстан тең құрылтайшыларының бірі болып табылатын Бейбітшілік кеңесінің қызметіне ерекше назар аударылды. Мемлекет басшысы еліміздің халықаралық тұрақтылықты нығайтуға және гуманитарлық бастамаларды қолдауға дайын екенін мәлімдеді.

Кездесу соңында тараптар қазақ-америка серіктестігін одан әрі тереңдетуге өзара ниетті екенін растады.