Астанада өткен жоғары деңгейдегі кездесуде Қасым-Жомарт Тоқаев Израиль президенті Ицхак Герцогпен кеңейтілген құрамда келіссөз жүргізді. Әңгіме барысында мемлекет басшысы Қазақстанның Ибраһим келісімдеріне ресми қосылу рәсімін елордада ұйымдастыру мүмкіндігін алға тартты, -деп хабарлайды «Dalamedia» ақпараттық порталы.

Президенттің айтуынша, бұл келісімдер өңірдегі тұрақтылықты нығайтып, сауда-экономикалық байланыстарға жаңа серпін беруі мүмкін. Сонымен қатар Тоқаев цифрландыру мен жасанды интеллект бағытындағы ынтымақтастықты күшейтуге ерекше мән беріп отырғанын жеткізді. Биыл елімізде осы салаларға басымдық берілгені де атап өтілді.

Өз кезегінде Израиль президенті Қазақстанды конфессияаралық келісім мен төзімділіктің үлгісі ретінде бағалап, екі ел арасындағы әріптестіктің қарқынды дамып келе жатқанын айтты. Ол сауда айналымын арттырып, іскерлік байланыстарды кеңейтуге мүмкіндік мол екенін атап өтті.

Сондай-ақ Израиль тарапы екі ел арасында тікелей әуе қатынасын ашуға қызығушылық білдірді.

Келіссөз қорытындысында тараптар саяси диалогты жалғастырып, өзара ықпалдастықты барлық деңгейде жандандыруға уағдаласты. Екі ел басшылары әріптестікті жаңа сапалы кезеңге көтеруге ниетті екенін білдірді.