Қазақстан Президенті Қасым-Жомарт Тоқаев асыл тұқымды жылқыларды көруге арнайы барғанын айтты, деп хабарлайды «Dalamedia» ақпараттық порталы.

Бұл туралы Мемлекет басшысы өзінің Instagram парақшасында жазба жариялады. Президенттің айтуынша, жуырда екі бие құлындап, Ақалтеке тұқымының қатарына жаңа төл қосылған.

«Алдыңғы төлдің атын Ақниет деп қойдым. Ал кейінгі туған құлыншақты Бөрте деп атадым», – деп жазды Президент.

Мемлекет басшысы жазбасында қазақтың «Ер жетіліп, бас болар, тай жетіліп, ат болар» деген нақылын келтіріп, қос құлынның да желмен жарысқан жүйрік болып өсуіне тілектестік білдірді.

Ақалтеке жылқысы әлемдегі ең көне әрі ең бағалы жылқы тұқымдарының бірі саналады. Сымбатты бітімі мен төзімділігімен ерекшеленетін бұл тұқым қазақ даласында да ерекше құрметке ие.