Мемлекет басшысы Қасым-Жомарт Тоқаев мамыр мерекесі қарсаңында Президент Іс басқармасына қарасты атқораға барып, әр жылдары сыйға берілген тұлпарлардың күтім жағдайымен танысты ,-деп хабарлайды «Dalamedia» ақпараттық порталы.

Жылқылар арасында бір жыл бұрын Ақалтеке тұқымынан туған қылаң боз тай бар. Президент оған Ақжан деп ат қойған еді. Мамандардың айтуынша, шоқтығы биік, бітімі келіскен, қимылы ширақ бұл жануардың табиғаты ерекше.

Сондай-ақ Ақалтеке тұқымының қатары жуырда тағы бір құлымен толыққан. Құла түстес құлынға Мемлекет басшысы Ақниет деген ат берген. Мамандар оны болашақта халықаралық бәйгелерде топ жара алатын тұлпар ретінде бағалап отыр.

Атқорада бұдан бөлек, жақында Қатардан сыйға келген араб тұқымды арғымақтар да күтіп-бапталуда.

Қасым-Жомарт Тоқаев мұнда ара-тұра арнайы келіп, тұлпарларға өз қолымен жем беріп тұратыны да айтылады.