Үкімет ұлттық мәдениет пен тарихи құндылығы бар ит тұқымдары – қазақтың тазысы мен төбетін дәріптейтін жаңа мерекені бекітті. Енді 3 қыркүйек жыл сайын «Қазақтың тазысы мен төбеті күні» ретінде аталып өтеді, ,-деп хабарлайды «Dalamedia» ақпараттық порталы.

Тиісті өзгерістер Үкіметтің 2026 жылғы 15 сәуірдегі №278 қаулысымен мерекелік күндер тізіміне енгізілген. Құжат 2026 жылғы 28 сәуірден бастап күшіне енеді.

Жаңа мерекенің негізгі мақсаты – қазақтың байырғы ит тұқымдарын сақтау, олардың тарихи әрі мәдени маңызын насихаттау екені айтылды.

Сонымен қатар қоғамда жануарларды қорғауға қатысты заңнамалық өзгерістер де талқыланып отыр. Бұған дейін тастанды иттерге қатысты белгілі бір мерзімнен кейін эвтаназия қолданылатыны туралы ақпарат тараған еді. Жаңа тәртіп бойынша қаңғыбас жануарлар панажайларда кемінде 5 күн, ал иесі бар болуы мүмкін жануарлар 60 күнге дейін ұсталады.

Осы уақыт ішінде жануардың иесі табылмаса, оны жаңа иелеріне беру немесе панажайда қалдыру сияқты мүмкіндіктер қарастырылады. Мәслихаттар бұл мерзімді ұзартуға құқылы.

Депутат Жаңбыршиннің айтуынша, заң жобасы жануарларды жаппай жоюды көздемейді. Оның сөзінше, басты мақсат – оларды ұстау тәртібін нақтылап, мүмкіндігінше жаңа иелер табуға жағдай жасау. Жануарлар арнайы күтімде болып, табиғи өмір сүру мүмкіндігі сақталатыны да атап өтілді.