Алматы облысында Наурыз мейрамын харам деп айтқан видео авторы қолға түсті — деп хабарлайды «Dalamedia» ақпараттық порталы.

Әлеуметтік желіде жарияланған видеода ер адам:

«Қазақта ешқашан ондай мейрам болмаған. Наурыз – парсылардан, отқа табынушылардан келген мереке. Наурыз деген сөз қазақтың өз сөзі емес, парстың ‘жаңа күн’ дегенінен шыққан. Егер сен мұсылман болсаң, бұл мерекені тойлай алмайсың» – деп мәлімдеген.

Ішкі істер министрлігінің хабарлауынша, бұл оқиға бойынша діни алауыздықты қоздыру фактісі бойынша қылмыстық іс қозғалған.

«Биыл 23 наурызда әлеуметтік желілерді бақылау барысында TikTok-та Наурыз мерекесіне қатысты діни және этномәдени сипаттағы бейнематериал анықталды. Жедел іс-шаралар нәтижесінде 1991 жылы туған К. есімді азамат ұсталып, уақытша ұстау изоляторына қамалды» – делінген хабарламада.

Қазіргі таңда қажетті тергеу әрекеттері жүргізіліп жатыр, ал тергеу мүддесіне байланысты қосымша ақпарат жарияланбайды.

Айта кетейік, Қылмыстық кодекстің 174-бабының 2-бөлігіне сәйкес, діни алауыздықты қоздыру – қоғамдық пікір көшбасшысы тарапынан жасалған жағдайда 5 жылдан 10 жылға дейін бас бостандығынан айыру жазасына тартуға әкеп соғуы мүмкін.