Алматыда бұралқы иттерді эвтаназиялауды көздейтін заң жобасына қарсы баспасөз конференциясы өтті,-деп хабарлайды «Dalamedia» ақпараттық порталы. Жануарлар құқығын қорғаушылар жаңа заң қабылдағаннан гөрі, қолданыстағы заңның дұрыс орындалуын қамтамасыз ету маңызды екенін алға тартты.

Белсенділердің айтуынша, 2021 жылы қабылданған «ұстау, зарарсыздандыру, вакцинациялау, босату» қағидаты көп өңірде толық жүзеге аспаған, керісінше иттерді жою тәжірибесі жалғасқан. KARE жануарларды қорғау қорының басшысы Юлия Коваленконың дерегінше, 2022 жылы елде 58 ит зарарсыздандырылып, 80 мыңға жуық ит жойылған. Оның сөзінше, бағдарлама қамту деңгейі төмен, ал жануарларды есепке алу мен бақылау жүйесі жеткіліксіз.

Қоғам белсенділері заңға жаңа түзетулерден бұрын оның орындалуына аудит жүргізіп, нақты бақылауды күшейту қажет деп есептейді. Сонымен қатар олар балаларды жануарларға қатыгездікке үйретпеу керектігін атап өтті. Экс-омбудсмен Аружан Саинның пікірінше, жануарларға жасалған зорлық кейін қоғамдағы басқа да қатыгездік түрлерімен тығыз байланысты болуы мүмкін. Оның айтуынша, мұндай әрекеттерді қалыпты құбылыс ретінде көрсету қауіпті салдарға әкеледі.

Еске салсақ, бұған дейін қаңғыбас жануарларды ұстау мерзімі мен эвтаназияға қатысты нормалар қоғамда қызу талқыланып келеді. Жоба авторлары бұл ретте автоматты түрде жою қарастырылмайтынын, жануарларды уақытша ұстау мерзімі сақталатынын және оларды жаңа иелеріне беру мүмкіндігі бар екенін айтады.