Мемлекет басшысы Қасым-Жомарт Тоқаев Қырғыз Республикасы Жогорку Кенешінің Төрағасы Марлен Маматалиевті қабылдады, -деп хабарлайды «Dalamedia» ақпараттық порталы.

Кездесу барысында Президент мәртебелі мейманға ілтипат білдіріп, оның Қазақстанға жасаған алғашқы ресми сапарының маңызына тоқталды. Қасым-Жомарт Тоқаев бұл сапардың екі ел арасындағы ынтымақтастықты одан әрі нығайтуға ықпал ететініне сенім білдірді.

Мемлекет басшысы Қазақстан мен Қырғызстан арасындағы байланыс әрдайым берік екенін атап өтті. Оның айтуынша, бауырлас халықтарды ортақ тарих пен рухани жақындық байланыстырады. Сондықтан екіжақты қарым-қатынасты одан әрі дамыту екі мемлекет үшін де маңызды.

Президент сондай-ақ Қырғызстан экономикасының тұрақты өсім көрсетіп отырғанын айтып, бұл оң өзгерістерді Қазақстан қолдайтынын жеткізді.

Кездесуде Қырғыз Республикасының Біріккен Ұлттар Ұйымы Қауіпсіздік Кеңесінің тұрақты емес мүшесі болып сайлануы да сөз болды. Мемлекет басшысы бұл жетістікті Қырғызстан ғана емес, тұтас Орталық Азия өңірі үшін маңызды тарихи оқиға деп бағалады. Осыған байланысты Президент Садыр Жапаровқа арнайы құттықтау хатын жолдағанын айтты.