Қырғызстанда бұрын жоғары лауазымды қызметтер атқарған бірқатар тұлғаларға қатысты резонансты қылмыстық іс қозғалып, оларға ресми айып тағылды, — деп хабарлайды «Dalamedia» ақпараттық порталы.

Адвокат Шердор Әбдіқапаровтың мәліметінше, Қамшыбек Ташиев, Құрманкул Зулушев және Нұрланбек Тургунбек Ұлы (Шакиев) жаппай тәртіпсіздік ұйымдастыру және мемлекеттік төңкеріс жасауға әрекет ету бабы бойынша жауапқа тартылып отыр. Оның айтуынша, бұл тұлғаларға бұған дейін басқа фигуранттарға тағылған айыптармен ұқсас баптар ресми түрде жарияланған.

Күштік құрылымдарға жақын дереккөздердің хабарлауынша, күдіктілер Ішкі істер министрлігінің Бас тергеу басқармасында бірнеше сағат бойы жауап берген. Алайда тергеудің нақты мазмұны мен егжей-тегжейі әзірге ресми түрде жарияланған жоқ.

Алдын ала ақпаратқа сәйкес, іс “75 адамның хаты” деп аталатын құжатпен байланысты болуы мүмкін. Бұған дейін 75 азамат Қырғызстан президенті Садыр Жапаров пен Жоғарғы кеңес төрағасына мерзімінен бұрын президент сайлауын өткізу жөнінде үндеу жолдағаны айтылған.

Осы оқиғалардан кейін ел ішінде бірқатар кадрлық және құрылымдық өзгерістер болған. Қамчыбек Ташиев ҰҚК төрағасы және Министрлер кабинетінің төраға орынбасары қызметінен босатылған. Ал Нұрланбек Тургунбек ұлы Жоғарғы кеңес төрағалығынан кетіп, депутаттық мандатын тапсырған. Құрманкул Зулушев те парламенттегі өкілеттігін доғарған.

Бұған дейін мемлекет басшысы Қамшыбек Ташиевтің аталған үндеуге қатысы барын жоққа шығарған. Сонымен қатар президент Садыр Жапаров оның мемлекеттік қызметке қайта оралуы мүмкін еместігін айтқан. Ал Конституциялық сот президент сайлауы белгіленген мерзімде, яғни 2027 жылдың қаңтарында өтетінін нақтылаған.