Мемлекет басшысы Қасым-Жомарт Тоқаев 31 мамыр – Саяси қуғын-сүргін және ашаршылық құрбандарын еске алу күніне орай үндеу жариялады, деп хабарлайды «Dalamedia» ақпараттық порталы.

Президент бұл күннің тарихи қасіретті ұмыттырмай, жазықсыз жапа шеккен жандардың рухына тағзым ету үшін маңызды екенін атап өтті. Оның айтуынша, өткеннен тағылым алып, заңдылық пен әділдік қағидаттарына адал болу – баршаға ортақ міндет.

Мемлекет басшысы азаматтардың құқықтары мен бостандықтарын қорғау бағытындағы жұмыстар жүйелі түрде жалғасып жатқанын айтты. Сондай-ақ бұл ұстанымдар жалпыұлттық референдум нәтижесінде қабылданған конституциялық өзгерістерде көрініс тапқанын жеткізді.

Қасым-Жомарт Тоқаев еліміздің әділдік, заң үстемдігі, отаншылдық, еңбекқорлық және табиғатқа құрмет секілді құндылықтарға сүйене отырып дамып келе жатқанын атап өтті.

Президент Қазақстанның халықаралық аренадағы беделі артып келе жатқанын айтып, алға қойылған мақсаттарға жету үшін қоғамдағы бірлік пен тұрақтылықтың маңызы зор екенін ерекше атап өтті. Оның сөзінше, елдің жарқын болашағы ынтымақ пен өзара сенімге тікелей байланысты.