Ресей аумағында үш қазақ мектебін салу жұмыстары қолға алынды. Бұл туралы премьер-министрдің орынбасары Серік Жұманғарин мәлімдеді,-деп хабарлайды «Dalamedia» ақпараттық порталы.

Вице-премьердің айтуынша, Орынбор қаласымен жер телімдері бойынша келісім жасалып қойған. Ал Астрахан мен Омбыда тиісті құжаттар бекіту кезеңінде тұр. Барлық рәсімдер толық аяқталғаннан кейін, жобалар бір мезетте ресми түрде бекітіледі.

Сонымен қатар, болашақ мектептерде қолданылатын оқу бағдарламалары мен әдістемелер екі елдің келісімімен әзірленбек. Жоба жақын уақытта жүзеге асуы жоспарланып отыр.

Айта кетейік, бұған дейін Қазақстан мен Ресей арасындағы келісім аясында еліміздің Қызылорда, Түркістан және Тараз қалаларында үш ресейлік мектеп салу жөнінде уағдаластық жасалған.