Қазақстан Президенті Қасым-Жомарт Тоқаев пен Ресей Президенті Владимир Путин Астанада ресейлік «Сириус» мектебінің құрылысына старт берді, — деп хабарлайды «Dalamedia» ақпараттық порталы.

Ақорданың мәліметінше, екі ел басшысы онлайн форматта «Қазақстан – Сириус» халықаралық білім беру инфрақұрылымының капсуласын салу рәсіміне қатысты.

Болашақ білім кешенінің іргетасына рәміздік капсуланы елордалық оқушылар Оқу-ағарту министрі Жұлдыз Сүлейменовамен, «Сириус» федералдық аумақ кеңесінің төрағасы әрі «Талант и успех» қорының жетекшісі Елена Шмелёвамен бірге орналастырған.

Ақпаратқа сәйкес, «Қазақстан – Сириус» жобасы екі мемлекет басшылары арасындағы келісім аясында жүзеге асырылып жатыр.

«Сириус» үлгісіндегі мектептер Қазақстанның екі қаласында бой көтереді. Бұған дейін биыл қаңтар айында Алматыда да осындай мектеп пен орталықтың іргетасы қаланған болатын.

Жобаның негізгі мақсаты – дарынды балаларға қолдау көрсетіп, ғылым, технология және инновация бағыттарын терең меңгерген бәсекеге қабілетті жаңа буын мамандарын даярлау.

Келіссөздерден кейін мемлекет басшылары Қазақстан мен Ресейдің мәңгі достығы аллеясына емен көшеттерін отырғызды. Бұл рәсім екі ел арасындағы өзара сыйластық пен ынтымақтастықтың белгісі ретінде сипатталды.

Айта кетейік, бұған дейін Ресейдің сыртқы істер министрі Сергей Лавров Қазақстанда тағы үш ресейлік мектеп салынатынын мәлімдеген еді. Оның айтуынша, екі ел алты мектеп салу жөнінде келісімге келген. Соның үшеуі Қазақстанда, қалған үшеуі Ресей аумағында бой көтермек.