Мемлекет басшысы Қасым-Жомарт Тоқаев Астана қаласының әкімі Жеңіс Қасымбек қабылдап, елорданың әлеуметтік-экономикалық және инфрақұрылымдық дамуы бойынша есеп тыңдады.

Кездесу барысында әкім қаладағы негізгі экономикалық көрсеткіштердің оң динамика көрсетіп отырғанын мәлімдеді. Биылғы төрт айда негізгі капиталға салынған инвестициялар көлемі 588 млрд теңгеге жетіп, өткен жылдың сәйкес кезеңімен салыстырғанда 9,1%-ға артқан. Инвестициялар өңдеу өнеркәсібі, білім, медицина, көлік, сауда және логистика салаларындағы жобаларға бағытталған.

Сонымен қатар, Астанада қоғамдық көлік жүйесін дамыту жұмыстары жалғасып жатқаны айтылды. Astana LRT жобасының толық іске қосылуы және екінші кезеңін пысықтау мәселесі қарастырылуда.

Білім беру инфрақұрылымына қатысты соңғы жылдары 44 мектеп салынған. Жаңа оқу жылында тағы 12 мектеп, 2 оқушылар сарайы және 6 балабақша ашу жоспарланған.

Денсаулық сақтау саласында 2028 жылға дейін 2 перинаталдық орталық, көпбейінді аурухана және диагностикалық кешен құрылыстарын аяқтау көзделіп отыр.

Мұғалімдердің жауапкершілігі заңмен нақты шектелмек

Мәжіліс депутаты Асхат Аймағамбетов жаңа заң жобасы аясында педагогтардың жауапкершілігін нақты айқындау ұсынылып отырғанын хабарлады.

Жаңа нормаға сәйкес, мұғалімдер тек оқу-тәрбие процесі кезінде ғана оқушылар үшін жауап береді. Ал сабақтан тыс уақыт, демалыс және каникул кезінде балалардың қауіпсіздігі ата-ананың жауапкершілігінде болады.

Депутаттың айтуынша, бұған дейін кей жағдайларда мұғалімдер олардың бақылауында болмаған оқиғалар үшін де жауапқа тартылған. Бұл әділетсіздік ретінде бағаланып отыр.

Бұл бастаманы депутат Ирина Смирнова да қолдап, педагогтің негізгі міндеті – білім беру, ал оқушының сабақтан тыс қауіпсіздігі ата-ананың міндеті екенін атап өтті.