Бүгін Қазақстан Президенті Қасым-Жомарт Тоқаев 73 жасқа толды,,-деп хабарлайды «Dalamedia» ақпараттық порталы. Ақорда мәліметінше, мемлекет басшысы туған күнін атап өтпейді. Бұл – оның отбасында бұрыннан қалыптасқан дәстүр.

Қасым-Жомарт Тоқаев саясатқа дипломатия саласынан келді. Ол Мәскеу мемлекеттік халықаралық қатынастар институтын тәмамдап, Сингапур мен Қытайда қызмет атқарған. Тәуелсіздіктің алғашқы жылдарында елге халықаралық деңгейде тәжірибесі бар, сабырлы әрі келіссөз жүргізе алатын мамандар қажет болды.

Президент қытай, ағылшын және француз тілдерін еркін меңгерген. Бұған дейін саясаттанушы Ерболат Сейлеханов Женевадағы студенттермен кездесуде Тоқаевтың бірнеше тілде еркін сөйлеп, қытайлық студенттің сұрағына қытай тілінде жауап бергенін айтқан еді.

Әріптестерінің сөзінше, Тоқаев жұмыс барысында ұсақ-түйекке дейін мән береді. Құжаттарды мұқият қарап, мәтіндерді бірнеше мәрте түзетіп, қысқа хабарламаның өзіне де ерекше назар аударатыны айтылады.

2019 жылы Қасым-Жомарт Тоқаев Қазақстандағы билікті Нұрсұлтан Назарбаевтан кейін қабылдаған алғашқы президент болды. Алғашында қоғам оны бұрынғы саяси бағыттың жалғастырушысы ретінде қабылдады.

Алайда 2022 жылғы Қаңтар оқиғасы елдегі саяси ахуалға да, президенттің саяси ұстанымына да әсер етті. Осыдан кейін «Жаңа Қазақстан» тұжырымдамасы жарияланып, саяси реформалар қолға алынды.

Президент бастамасымен Конституцияға өзгерістер енгізіліп, бірқатар жаңа саяси реформалар жүзеге асты. Сонымен қатар, «Халық үніне құлақ асатын мемлекет» қағидаты Тоқаевтың негізгі саяси бағытының біріне айналды.

Соңғы жылдары геосаяси ахуал күрделенген тұста Тоқаевтың дипломатиялық тәжірибесі айқын көрінді. Қазақстан Ресей, Қытай және Батыс елдерімен қарым-қатынаста көпвекторлы саясатты сақтап келеді.

Қасым-Жомарт Тоқаевтың президенттік кезеңі пандемия, Қаңтар оқиғасы, саяси реформалар және жаһандық тұрақсыздықпен тұспа-тұс келді.