Президент Қасым-Жомарт Тоқаев елордадағы қоғамдық көлік қозғалысын бақылайтын және оның жұмысын үйлестіретін Бірыңғай диспетчерлік орталыққа барып, LRT жүйесінің қызметімен танысты,,-деп хабарлайды «Dalamedia» ақпараттық порталы.

Ақорданың мәліметінше, Мемлекет басшысына Астана әкімі Жеңіс Қасымбек жеңіл рельсті көлік іске қосылғаннан кейін арнайы диспетчерлік қызмет құрылғанын баяндады. Қазір қаладағы қоғамдық көліктің қозғалысын бақылап, жұмысын реттеуге 21 маман жауапты.

Жеңіл рельсті көліктің әр құрамы 600-ден астам жолаушыны тасымалдауға лайықталған. Ұзындығы 22,4 шақырым болатын бағытта 15 құрам жүргізушісіз қатынайды, тағы 4 пойыз резервке қойылған.

Жүйедегі қозғалыс толық автоматтандырылған. Пойызды жүргізу, жылдамдықты реттеу, тежеу, есіктерді ашу және төтенше жағдай кезіндегі әрекеттер автоматты түрде орындалады. Сонымен қатар қажет жағдайда қолмен басқару және диспетчермен тікелей байланыс орнату мүмкіндігі қарастырылған.

LRT желісінде 18 станция мен заманауи депо жұмыс істейді. Бағыттың толық ұзақтығы шамамен 40 минутқа созылады. Пойыздар орташа есеппен сағатына 50-60 шақырым жылдамдықпен жүріп, әр 5-6 минут сайын қатынайды.

Президент бұл жобаның іске қосылуын Астана мен ел үшін маңызды оқиға деп бағалады. Сондай-ақ елорда алдағы уақытта Еуразия кеңістігіндегі ірі көлік хабына айналуы тиіс екенін айтты.

Сапар барысында Қасым-Жомарт Тоқаевқа 001 сериялы карта табысталды. Мемлекет басшысы LRT-нің алғашқы жолаушысы ретінде «Әуежай» станциясынан «Ұлттық музей» станциясына дейін жүріп өтті.