Алматы қаласының бұрынғы әкімі Бауыржан Байбектің жаңа қызметі белгілі болды,-деп хабарлайды «Dalamedia» ақпараттық порталы.

Қазіргі таңда Бауыржан Байбек Qazaq Kaolin тау-кен байыту комбинатының директорлар кеңесінің төрағасы қызметін ресми түрде атқарады.

Еске салайық, 2022 жылдың ақпанында ол "Nur Otan" партиясы төрағасының бірінші орынбасары қызметінен өз еркімен кеткен болатын. Осыдан кейін бұрынғы шенеунік білім алу үшін Біріккен Араб Әмірліктеріне кетіп, онда екі жылдан астам уақыт өткізді. Сол кезеңде ол Қазақстандағы жобаларға шетелдік инвестиция тартумен де айналысқан.

Оның әпкесі Айгүл Байбектің айтуынша, кейін Байбек Жапонияға қоныс аударып, жапон капиталы мен технологияларын тарта отырып, оларды Қазақстанда енгізуге бағытталған инновациялық жобаларды дамытумен айналысқан.

Компания іске қосылардан бірнеше ай бұрын Байбек мансаптық тұрғыда жылдам өсіп, кеңесші қызметінен бірден компанияның директорлар кеңесінің төрағасы лауазымына тағайындалды. Бұл ақпарат Qazaq Kaolin компаниясының ресми сайтында жарияланған.