Мемлекет басшысы Қасым-Жомарт Тоқаев 7 мамыр — Отан қорғаушылар күніне орай қазақстандықтарға құттықтау жолдады, ,-деп хабарлайды «Dalamedia» ақпараттық порталы.

Президент бұл мерекенің мемлекеттік әрі қоғамдық маңызы ерекше екенін атап өтіп, ел қауіпсіздігін қамтамасыз етіп жүрген әскери қызметкерлердің еңбегіне жоғары баға берді. Оның айтуынша, сарбаздар мен командирлер батыр бабалардың жолын жалғастырып, отаншылдықтың жарқын үлгісін көрсетіп келеді.

Құттықтауда армияның кәсіби дайындығы мен тәртібі халықаралық оқу-жаттығулар мен бітімгерлік миссияларда айқын көрініс тауып жүргені айтылды. Мемлекет басшысы Қазақстан әскерінің кез келген күрделі міндетті орындауға дайын екенін жеткізді.

Сондай-ақ Президент елдің қорғаныс қабілетін күшейту мен әскери қызметкерлердің әлеуметтік жағдайын жақсарту мәселесіне мемлекет әрдайым басымдық беретінін атап өтті.

Қасым-Жомарт Тоқаев Конституцияда Отанды қорғау әр азаматтың қасиетті парызы екені жазылғанын еске салып, бұл қағида мемлекет пен халықтың өзара байланысын нығайтатынын айтты.

Мемлекет басшысы сөз соңында әскери антқа адал болып жүрген барлық Отан қорғаушыларына алғыс айтып, қазақстандықтарға денсаулық, амандық және табыс тіледі.