Бүгін Астанада Өңірлік экологиялық саммит өтіп жатыр. Шараға қатысу үшін келген делегация жетекшілері EXPO көрме орталығына жиналды. Құрметті меймандарды Қазақстан Президенті Қасым-Жомарт Тоқаев қарсы алды, – деп хабарлайды «Dalamedia» ақпараттық порталы.

Ақорда таратқан мәліметке сәйкес, бұл жиын Біріккен Ұлттар Ұйымы және өзге де халықаралық ұйымдардың қолдауымен ұйымдастырылған. Саммиттің негізгі мақсаты – экожүйені сақтау, су мен жер ресурстарын қорғау және оларды тиімді пайдалану бағытында ортақ саясат қалыптастыру. Сондай-ақ Орталық Азиядағы биоалуантүрлілікті сақтау мәселесі де күн тәртібінде тұр.

Пленарлық отырыста Қазақстан Президентімен қатар Қырғызстан басшысы Садыр Жапаров, Өзбекстан Президенті Шавкат Мирзиёев, Тәжікстан Президенті Эмомали Рахмон, Түрікменстан Президенті Сердар Бердімұхамедов, Армения Президенті Ваагн Хачатурян, Моңғолия Президенті Ухнаагийн Хурэлсух, Грузия Президенті Михаил Кавелашвили сөз сөйлейді деп жоспарланған.

Сонымен бірге Әзербайжан премьер-министрі Али Асадов, БҰҰ өкілдері – экономикалық және әлеуметтік мәселелер жөніндегі Бас хатшының орынбасары Ли Цзюньхуа, Қоршаған орта бағдарламасының атқарушы директоры Ингер Андерсен және Еуропалық экономикалық комиссияның атқарушы хатшысы Татьяна Молчан да өз баяндамаларын ұсынбақ.