Іс Жамбыл облысының мамандандырылған ауданаралық қылмыстық істер сотында қаралды. Тергеу дерегіне сүйенсек, оқиға 2025 жылғы 27 шілдеде Мойынқұм ауданындағы «Алматы – Екатеринбург» тас жолында болған. Көлікті басқарған Рахмонова шаршаған күйде рөлге отырып, қарсы бағытқа шығып кеткен. Соның салдарынан жол-көлік оқиғасы орын алып, көлік аударылған.

Апат нәтижесінде екі жолаушы – сотталушының танысы мен әпкесі ауыр жарақаттан көз жұмған. Ал Рахмонова ауруханаға жеткізілген.

Сот барысында кінә тараптардың айғақтары мен сараптама қорытындылары арқылы дәлелденген. Прокурор оған 5 жыл бас бостандығынан айыруды және 7 жылға көлік жүргізу құқығынан айыруды сұраған.

Жәбірленуші тараптар сотталушыны кешіріп, қатаң жаза қолданбауды өтінген. Ал Рахмонова өз кінәсін мойындамаған.

Сот шешімімен ол Қылмыстық кодекстің 345-бабы 4-бөлігі бойынша кінәлі деп танылып, 5 жылға бас бостандығынан айырылды. Сонымен қатар 7 жылға көлік жүргізу құқығынан айырылды. Алайда кәмелетке толмаған балаларының болуына байланысты жаза өтеу мерзімі 5 жылға кейінге шегерілді.