«Аппағым» деп алты алашты аузына қаратқан танымал рэп орындаушы Qarakesek-ке қатысты сот үкімі шықты. Өнер иесі психотроптық затты заңсыз сақтағаны үшін кінәлі деп танылды, – деп хабарлайды «DalaMedia» ақпараттық порталы.

Ақтөбеде өткен сотқа Qarakesek лақап атымен танымал Омар Аманбаев мәжбүрлі түрде жеткізілген. Соңғы сөзінде ол тағылған айыпты толық мойындап, жасаған ісіне өкініш білдірді. Өнер иесі өзін бас бостандығынан айырмауды сұрап, емделуге мүмкіндік беруді өтінген. Сондай-ақ айыппұл немесе қоғамдық жұмыс тағайындауды сұраған. Оның айтуынша, төрт баласы бар және мамандар көмегіне мұқтаж.

Ақтөбе қаласы №2 сотының судьясы Тұрсынхан Салықовтың мәлімдеуінше, сот шешімімен Аманбаевқа 100 сағат қоғамдық жұмыс және есірткіге тәуелділіктен мәжбүрлі ем қабылдау жазасы тағайындалды.

Сот отырысынан кейін рэпер мен оның адвокаты түсірілімге тыйым салып, қандай да бір пікір беруден бас тартты.

Рэпер 2025 жылғы 30 тамызда мас күйінде көлік басқарған. Тексеріс барысында жанынан 0,26 грамм психотроптық зат табылған.

Айта кетейік, бұған дейін Омар Аманбаев әкімшілік іс бойынша да жауапқа тартылған. Мамандандырылған ауданаралық сот оны мас күйінде көлік жүргізгені үшін кінәлі деп танып, 15 тәулікке қамаған және 7 жылға көлік жүргізу құқығынан айырған.