Қазақстандық Shoqansuits ерлер киімі бренді әлеуметтік желіде жариялаған видеосынан кейін көпшіліктің сынына ұшырады. Компания жарнамасында «Борат» фильміндегі кейіпкердің образын қолданған. Бұл әрекет желі қолданушыларының наразылығын туғызып, видео кейін Instagram мен TikTok-тағы парақшаларынан өшірілді.

Алайда видеоның көшірмесі әлеуметтік желілерде тарап кетті. Көпшілік мұны Қазақстанның имиджіне нұқсан келтірген кейіпкерді насихаттау деп бағалап, брендке бойкот жариялауға шақырды. Кейбірі компания өнімдерінен бас тартуға үндеді.

Пікір білдірушілердің бір бөлігі мұны сәтсіз маркетингтік шешім деп бағаласа, енді бірі компанияның қазақ халқына және ұлттық құндылықтарға деген құрметінің төмендігін көрсетті. Сондай-ақ желі қолданушылары Shoqansuits-ті әлеуметтік желідегі контентін қазақ тілінде көбірек жүргізуге шақырып, Қазақстанда жұмыс істейтін кез келген бренд елдің мәдениеті мен қоғамдық ұстанымын ескеруі тиіс екенін айтты. Кейбір тұтынушылар компания өнімдерінен бас тартуға үндеп, бойкот жариялау туралы пікірлерін де ашық жазды.