Қазақстандық Sen Sulu косметика бренді жарнамалық роликке ресейлік блогер Валя Карнавалды түсіргеннен кейін желі қолданушыларының сынына ұшырады, ,-деп хабарлайды «Dalamedia» ақпараттық порталы.

Әлеуметтік желіде брендтің бұл шешімі қызу талқыға түсіп, көпшілік компанияны отандық аудиторияның пікірін ескермеді деп айыптады. Желі қолданушылары блогерге қатысты бұған дейін тараған жағымсыз әңгімелерді қайта қозғап, брендке бойкот жариялауға шақырды.

Пікір білдірушілердің бір бөлігі қазақстандық арулардың өзі жарнаманы лайықты деңгейде алып шыға алатынын айтып, шетелдік блогерді таңдаудың орынсыз болғанын жазды. Кейбірі енді аталған брендтің өнімдерін сатып алмайтынын ашық мәлімдеді.

Қоғамдағы сын күшейген соң компания өкілі Бақытгүл Қазбекова жағдайға қатысты пікір білдірді. Оның сөзінше, Sen Sulu қазақстандық қана емес, халықаралық нарыққа да шығуды көздейтін бренд болғандықтан, бұл ынтымақтастық жаңа аудиторияны қамтуға бағытталған жарнамалық науқанның бір бөлігі ғана болған.

Компания өкілі Валя Карнавалдың брендтің ресми бет-бейнесі емес екенін де нақтылады.

Даудың өршуіне YouTube арнасында блогер Антон Суворкин айтқан мәлімдеме себеп болған. Ол түсірілім кезінде Валя Карнавал қазақтарға қатысты жағымсыз пікір білдіріп, алаңнан «барлық қазақты алып тастауды» сұрағанын айтқан. Сондай-ақ блогер қазақ тілінде сөйлеген адамға да теріс реакция танытты деген ақпарат тарады.

Алайда Валя Карнавал бұл айыптауларды жоққа шығарып, мұның бәрін жала және арандату деп атады. Ол Telegram парақшасында қазақстандықтармен жұмыс істегеніне ризашылығын білдіріп, ел тұрғындарын мейірімді әрі қонақжай халық деп сипаттады.