«Қазсушар» РМК Жамбыл өндірістік филиалының директоры Қайрат Аманов пен бас инженері Ербол Әбдірахмановқа қамауға алынды. Оларға қатысты екі ай мерзімге қамауда ұстау түріндегі бұлтартпау шарасы қабылданды, – деп хабарлайды «Dalamedia» ақпараттық порталы.

9 шілде – Су шаруашылығы қызметкерлері күні аталған мекеменің Жамбыл облыстық филиалында, басшылыққа қатысты тергеу амалдары жүргізілген. Сол күні кәсіпорын ғимаратында тінту өтіп, нәтижесінде екі маман құқық қорғау органдарына жеткізілген.

Мекеме мамандары олардың жұмыс орнында жоқ дегендерімен, қашан оралатынын айта алмаған.

Кейін сот күдіктілерге қатысты екі ай мерзімге қамауда ұстау түріндегі бұлтартпау шарасын санкциялады.

Қолда бар деректерге сүйенсек, қылмыстық іс құжаттарға қол қою кезіндеге заңбұзушылықтарға байланысты қозғалған.

Құқық қорғау органдары әзірге іс бойынша тағылған күдік пен тергеу барысына қатысты ресми ақпарат таратқан жоқ.

Қайрат Аманов әр жылдары Жамбыл облысы әкімдігінің Ауыл шаруашылығы басқармасын басқарған, сондай-ақ Сарысу ауданы әкімінің орынбасары қызметін атқарған.

Қазіргі уақытта іс бойынша сотқа дейінгі тергеу жалғасып жатыр. Қосымша ақпарат ресми органдардың мәлімдемесінен кейін жарияланады.