Жамбыл облысының әкімі Ербол Қарашөкеев Қазақстан Республикасының жаңа Конституциясының заңды күшіне енуіне орай облыс активімен кездесті, – деп хабарлайды «Dalamedia» ақпараттық порталы.

Кездесу барысында аймақ басшысы қатысушыларды ел өміріндегі маңызды тарихи оқиғамен құттықтап, жаңа Ата заңның елдің орнықты дамуы мен әділетті қоғам құрудағы рөліне тоқталды. Оның айтуынша, Мемлекет басшысы Қасым-Жомарт Тоқаев жаңа Конституцияның Қазақстанның одан әрі жаңғыруына берік құқықтық негіз қалайтынын атап өткен.

Облыс әкімі жаңа Конституция аясында мемлекеттік басқару жүйесін жетілдіру, экономиканы жаңа деңгейге көтеру, энергетика мен инфрақұрылымды дамыту, цифрландыруды жеделдету және адам капиталын нығайту секілді негізгі басымдықтар айқындалғанын айтты. Бұл бағыттардың барлығы өңірдің тұрақты дамуына серпін береді.

Сондай-ақ Ербол Қарашөкеев Конституцияда белгіленген міндеттерді жүзеге асыру бүкіл қоғамға ортақ жауапкершілік екенін атап өтті. Оның сөзінше, Мемлекет басшысының бастамасымен қолға алынған «Заң мен тәртіп», «Таза Қазақстан» және «Адал азамат» жалпыұлттық бастамалары заң үстемдігін күшейтіп, азаматтық жауапкершілікті арттыруға бағытталған.

Жиында облыстық соттың төрағасы Ерлан Қосмұратов, облыс прокуроры Жандос Әбдібаев және полиция департаментінің бастығы Қайсар Сұлтанбаев сөз сөйлеп, жаңа Конституцияның құқық үстемдігін қамтамасыз ету мен азаматтардың құқықтары мен бостандықтарын қорғаудағы маңызына тоқталды.

Кездесу соңында облыс әкімі мемлекеттік органдарды, құқық қорғау құрылымдарын, депутаттық корпусты, азаматтық қоғам өкілдерін және өңір тұрғындарын жаңа Конституцияда белгіленген міндеттерді бірлесіп жүзеге асыруға шақырды.