Ақмола облысында үш көліктің қатысуымен болған жантүршігерлік жол апаты салдарынан бес адам қаза тапты. Тағы бес адам түрлі жарақатпен ауруханаға жеткізілді, деп хабарлайды «Dalamedia» ақпараттық порталы.

Қайғылы оқиға 21 маусым күні сағат 14:56 шамасында Целиноград ауданындағы Астана – Қорғалжын тасжолында, Оразақ пен Өтеміс ауылдарының аралығында болған.

Полицияның мәліметінше, жол апатына Kia, Toyota Fortuner және Toyota Land Cruiser маркалы автокөліктері қатысқан.

Қатты соққыдан кейін Toyota Fortuner мен Toyota Land Cruiser көліктері өртеніп кеткен. Өрт сағат 15:35-те толық сөндірілген.

Оқиға салдарынан бес адам сол жерде көз жұмды. Тағы бес адам әртүрлі жарақат алып, медициналық мекемелерге жеткізілді.

Қазір жол апатының себептері мен мән-жайын анықтау үшін тергеу жүргізіліп жатыр. Аталған факті бойынша сотқа дейінгі тергеу басталды.